Presidente di Parlamento ta extende su condolencia na famia di e angelitonan cu e wordo ranca for di e mundo aki cruelmente

Den nomber di Parlamento di Aruba, Presidente di Parlamento, sr. Juan E. Thijsen kier a extende su mas sentido palabranan di condolencia na famia di Rishandroh Anastacia y Roshandrick Frans.

Di e manera aki Parlamento di Aruba den su totalidad ta uni su mes na e duele y luto nacional pa cu e bidanan inocente cu a jega na nan fin di un forma inexplicabel y difícil pa compronde. Futuronan yen di promesa y posibilidadnan infinito lo no por ser concretisa mas.

 

Aunke difícil pa acepta, Parlamento di Aruba ta comparti cu henter comunidad Arubano e momentonan difícil aki. Banda di para keto na e sucedido lamentabel aki Parlamento ta desea di reflexiona riba e rol cu cada ciudadano di Aruba mester compromete su mes na asumi pa sucesonan manera esun lamentabel aki no pasa nunca mas.

 

Parlamento Di Aruba ta haci un yamada na pueblo di Aruba den su totalidad pa no laga e hechonan lamentabel aki pasa bai manera un recuerdo tristo. E yamada ta pa uni forsa y asumi responsabilidad, pa na prome lugar, esnan mas vulnerabel den nos comunidad pero na mes momento para banda di otro y nos tur asumi dicho reponsibilidad pa garantisa e proteccion di cada un di nos como ciudadano di nos pida baranca.

 

Parlamento di Aruba semper a para na vanguardia di esnan vulnerabel den nos comunidad. Un prueba di esaki ta e mocion fecha dia 3 di juni 2015 na unda un delegacion special di Parlamento di Aruba, consistiendo di Srs. Thijsen, Bikker, Dammers Sneek y sra. Ruiz-Maduro, a pidi gobierno di Reino durante un conferencia di Reino pa establece un protocol di cooperacion riba tereno di e tratado firma na Istanboel dia 11 di mei 2011 encuanto prevencion di agresion contra hende muher y den hogarnan.

 

Ban hunto mustra e famia dia Rishandroh Anastacia y Roshandrick Frans cu nan no ta para nan so den e momentonan difícil aki sino cu henter comunidad di Aruba ta convivi e momentonan aki hunto cu nan cu e firme promesa di no laga fayecimento di Rishandroh Anastacia y Roshandrick Frans ta envano sino un yamada pa conscientisacion y balorisacion di nos prohimo manera mester ta.

Leave a Reply

Top