Prome biaha Aruba tin un Gobierno di 8 Minister

Durante un conferencia di prensa Formador Evelyne Wever Croes, flankea pa Ricardo Croes di RED y Otmar Oduber di POR, a anuncia cu despues di 35 dia tin un Gobierno nobo. Remarcabel den e anuncio aki tabata cu pa prome biaha na Aruba tin un Gobierno di 8 Minister.

Segun AWEMainta tin entendi simper e cantidad aki mester ta “oneven” pa ora yega na momento di tuma un decision pa keda den un impasse. Ademas cu e ta 8 Minister, e ta contrario na loke tur tres partido a promove durante campaña electoral cu lo baha e cantidad di Ministernan na 7.

Evelyne Wever Croes durante e conferencia den oranan di atardi na APA, a sigura cu nan a bini cu un formular cu toch e gastonan ta baha, pasobra e cantidad di coordinador y conseheronan lo ta menos cu e Gobierno anterior, yegando kisas na solamente e cantidad di coordinador cu e ex Prome Minister so tabatin. Ta bay traha cu profesionalnan cu ta wordo paga un salario regular. Sinembargo a wordo anuncia cu Dangui Oduber a haya dos Ministerio pisa di cual den un din an (Salubridad Publico) e lo haya asistencia di Arturo Vallejo pa maneha esaki.

E Gabinete cu a wordo anuncia durante e conferencia di prensa ta consisti di e siguiente personanan cu nan respectivo Ministerio: Evelyna Wever Croes Ministerie van Algemene Zaken, Integriteit, Energie, Innovatie; Xiomara Ruiz-Maduro Ministerie van Financiën, Economische Zaken en Cultuur; Glenbert Croes Ministerie van Sociale Zaken en Arbeid; Danguillaume Oduber Ministerie van Toerisme, Volksgezondheid en Sport (den esaki e ta haya asistencia di Arturo Vallejo cu e parti di Salubridad Publico); Chris Romero Ministerie van Transport en Communicatie en Primaire Sector; Otmar Oduber  Ministerie van Infrastructuur en Milieu; Andin Bikker Ministerie van Justitie en Immigratie; Armando Lampe Ministerie van Onderwijs, Wetenschappen en Duurzame Ontwikkeling; Guilfred F. Besaril ta bira minister plenipotenciario y Presidente di Parlamento ta Ady Thijsen.

No a menciona nada di e parti di e representacion di Aruba na Washington, pero por a compronde cu esaki ta un proceso un poco diferente cu esun di Minister Plenipotenciario na Hulanda.

“Nos tin Gobierno. Gabinete Wever Croes, consistiendo di MEP, POR y RED ta un realidad,” di e forma aki Formador Evelyne Wever Croes a cuminsa su conferencia di prensa. Otro miembronan di partido cu a compañe e atardi aki tabata Presidente di Partido MEP dr. Gerrit Croes, Xiomara Ruiz Maduro y Guilfred Besaril.

El a admiti cu e negociacionnan no tabata facil pasobra a bay campaña cu proposicionnan diferente cu otro y tin biaha contradictorio cu otro. Pero, el a bisa, pueblo a dicidi otro cu nan kier un coalicion. Pesey a  negocia, poniendo awa den biña pa yega na e coalicion cu pueblo a pidi p’e. Den cuadro di esaki lo instala un comision cu lo mester intermedia ora cu surgi problema entre e partnernan di coalicion.

Den su conferencia el a papia hopi di e negociacionnan cu mester a haci ya cu MEP no a haya tur e carteranan, pasobra nan mester bay goberna cu dos partner.  cu no ta tur a haya e cartera kisas cu nan tabata kier. “Den un coalicion kiermen reparti e trabounan. Pero no ta tur hende a realisa ainda cu un coalicion ta nifica reparti e trabounan y responsabilidad.”  Pesey, el a agrega, e programa di Gobernacion ta importante pasobra eyden e deseonan di e partidonan ta inclui. “Esaki ta un coalicion di tres partido, y no ta islanan.”

 

Top