Prome Minister Evelyn Wever Croes: Gobierno ta trahando riba un plan alternativo pa San Nicolas

Despues di a haya nan mes obliga di elimina e regimen fiscal special pa San Nicolas, pa evita cu ta bay riba Black List di OECD, Prome Minister Wever Croes a bisa cu nan ta trahando riba un plan alternativo pa San Nicolas.
Gobierno ta trahando riba alternativanan pa atrae inversion den San Nicolas, basa riba un plan integral pa desaroyo di San Nicolas; e main street y vecindario. “Nos lo crea un luga pa tiendanan chikito cu semper tabata na San Nicolas, y cu a haci San Nicolas grandi. E luganan rond di Zeewijk lo wordo destina pa area di industria liviano, y lo crea empleo. Lo studia e posibilidad pa establece universidad y nan campus na San Nicolas, pa atrae un otro tipo di bishitante. Lo evalua establecimento di hotel na Seroe Colorado.”
Ademas di e puntonan ariba menciona, e mandatario a señala cu e terenonan di refineria cu no ta wordo uza mas, lo bay bek pa pais Aruba. Momento cu elimina e muraya di ‘LAGO’, lo crea acceso pa lama, pa henter comunidad. E intencion ta pa crea un area di ‘Waterfront’ pa haci San Nicolas atractivo pa negoshinan den horeca. Museonan lo wordo traha y finalisa, pa asina atrae e turista cu ta gusta arte, pa e bay San Nicolas. Pues: San Nicolas lo bira e ciudad cu e forsa atractivo Caribense, cu ta atrae tur turista.
Gobierno ta lamenta cu mester a elimina e regimen fiscal faborabel pa San Nicolas, sinembargo e regimen aki no a trece desaroyo pa San Nicolas y ademas ta causando Aruba hopi problema. “Un biaha mas e pueblo di San Nicolas a wordo engaña pa partido AVP. Pesey nos gobierno ta compromete su mes cu crea otro oportunidadnan pa realmente trece desaroyo den San Nicolas.”

Leave a Reply

Top