Prome Minister Evelyne Wever Croes: E plan financiero di Aruba lo no ta mas segun ley di CAFT

Awe mainta Gabinete Wever Croes a yama un conferencia di prensa unda cu a hiba palabra e prome mandatario, kende tabata compaña pa Minister Plenipotenciario Guilfred Besaril.

Esaki tabata algo cu e
mandatario a expresa na inicio di su conferencia, cual tabatin como tema e grupo grandi di personanan cu a haya nan carta di
retiro for di Gobierno.

“Esaki lo ta un aña prometedor. Un aña den cual e cambionan cu nos a compromete nos mes cun’e den campaña electoral lo mira su fundeshi. Pero tambe e aña den cual e reto mas grandi ta keda e reto financiero di pais Aruba,” el a cuminsa su conferencia señalando e aspecto aki.

E mandatario no a bay ampliamente riba e tema, pero si declara cu loke e por bisa pueblo di Aruba ta cu “nos ta finalisando e plan financiero cu ta mustra con nos ta bay cumpli cu e palabracionnan financiero haci den Reino.

No mas segun e ley di CAFT, sino un trayectorio realistico, basa riba cifranan real, riba e forma con nos por yega na un presupuesto balansa. Pero na mesun momento creando espacio pa tin un desaroyo economico sano na Aruba y cu por atende cu temanan social, di salud y di enseñansa.”

E ariba menciona,
e mandatario a enfatisa,
ta e plan cu ta
trahando riba dje.

Y unabes cu esaki keda cla lo hiba esaki pa discusion den Reino, na Hulanda. Como cu Aruba ta bou e ley di supervision di CAFT, mester di aprobacion di Hulanda pa cualkier desviacion.

“Mi tin cu bisa cu te ainda nos a haya espacio di Hulanda pa traha riba nos plan. Mi a haya confirmacion cu nan lo no propone un KB (aanwijzing), apesar cu nos ta actuando den violacion cu ley, a base di cifranan cu nos a haya, peor ta dunando nos espacio, mustrando asina confiansa den e Gobierno aki.”

Un otro reto grandi cu Prome Minister Wever Croes a bisa cu su Gobierno ta bay enfrenta e aña’ki ta e problemanan social.

Ta trata di retonan social cu ta wordo causa door di situacionnan financiero dificil den famianan pa cual mester percura pa baha e costo di bida na Aruba, introduciendo debido control di prijs di productonan, baha tarifa di awa y coriente, percura pa tin mas cupo di empleo pa trece un miho situacion financiero den e famianan y cuminsa alivia e peso cu tin den cada hogar.

“Nos ta consciente
cu esaki no ta soluciona tur e retonan social riba nos pais … Nos meta pa trece un alivio den e tension
social cu tin na Aruba,”
e mandatario a bisa.

Leave a Reply

Top