Prome Minister Wever Croes a ricibi e Tratado Derecho di Persona cu Discapacidad

Diabierna mainta tempran na Plaza Padu, Prome Minister Evelyn Wever-Croes y Presidente di Parlamento Sr. Ady Thijsen a ricibi e version traduci di e Tratado tocante derecho di persona cu discapacidad for di “Stichting voor Verstandelijk Gehandicapten Aruba” relaciona cu Dia Mundial di Hendenan cu Limitacion dia 3 di December. Na e ocasion aki tabata presente tambe Ministernan di Gabinete Wever-Croes y Parlamentarionan.

Prome Minister Evelyn Wever-Croes a hiba palabra y a elogia y gradici tur esnan cu ta traha den e trabou dificil di guia nos muchanan special.

E Tratado tocante derecho di persona cu discapacidad ta hopi importante pasobra aki ta trata di haci e ser humano central cual ta hopi importante den maneho di Gobierno. “Y nos lo cuminsa cu esnan mas vulnerabel den nos comunidad na unda e grupo di personanan special tambe ta parti,” e mandatario a bisa.

Ta pa Gabinete Wever-Croes un prioridad pa traha pa tur persona special tin miho oportunidadnan. Pa bay scol, pa tin un trabou, pa tin un cas. Tur mester tambe tin e cariño y amor di famia. Inclusion pa esnan special ta un compromiso di Gobierno pa tur mucha special haya un luga den nos comunidad caminda nan por bay scol y despues cu nan haci 16 aña por bay un scol di ofishi cu lo yuda nan drenta mercado laboral y wordo inclui den nos comunidad y gosa di tur derecho mescos cu tur otro ciudadano riba nos pais.

Leave a Reply

Top