Prome Minister Wever Croes despues di bishita na Gobernador – Nos no por a dal start facil

E tema financiero ta un reto hopi grandi y awor sit a sigur cu nos no ta bay logra loke ley ta prescribi pa no cera e aña cu ningun deficit adicional. Esaki ta loke e mandatario a bisa na su salida di un bishita di trabou cerca Gobernador Alfonso Boekhoudt y kende tambe a wordo informa di e situacion aki.

Tur cos ta mustra, el a bisa, cu ta bay cera e aña cu un deficit di 100 miyon florin adicional. “Ta importante pa Gobernador ta bon informa di e situacion financiero y por si acaso cu Hulanda duna su comentario.

Tambe a informa e representante di Reino cu su Gobierno tin un idea con pa soluciona e problema y cu ta trahando riba e plan, e caminda pa cana, pa bini bek riba e curso corecto. Den e plan lo delinea pa ki tempo lo yega na e 0.5% di deficit y despues e surplus di 0.5% cu ta papia di dje.  Su Gobierno kier logra un trayectorio unda cu ta cumpli cu e debernan y na mesun momento crea espacio pa inversion, den desaroyo economico pero tambe pa atende temanan social cu ta un preocupacion aworaki.

Den curso di awe e mandatario via un tele-conference ta bay tin un reunion cu Prome Minister di Hulanda Mark Rutte.  Den e reunion aki, e mandatario a bisa, ta bay pidi Hulanda espacio pasobra awor e presion di mas grandi ta e palabracionnan hinca den e ley di CAFT. E siguiente paso cu Gabinete Wever Croes ta bay haci ta fia placa pasobra e 100 miyon di deficit extra di ningun manera por sake di e pueblo, pero “nos a dicidi cu no ta bati na porta di pueblo.” Pa fia e placa aki no mester di aprobacion di Hulanda, pero si nan “backup”.

El a referi na e carta di 2 siman pasa di CAFT unda cu nan ta bisa di no ta mira cu lo logra e norma di 0.5% di deficit y e otro carta di ex Minister Bermudez cu a pidi CAFT pa duna nan comentario riba e presupuesto supletorio. Esaki CAFT ta bisa no ta cumpli cu normanan, pasobra no a tene cuenta cu entradanan ta kedando atras y no a tene cuenta cu e gastonan ta aumentando.

Tambe a papia cu Gobernador riba e fecha di diaranson, un dia nacional di luto pero cu no ta un dia liber, pero pa hunto rechasa loke cu a pasa y reflexiona riba e tema.

Leave a Reply

Top