Resultado di Dande Festival na Hulanda

HARPA ta un fundacion cu apenas 2 luna bieuw, unda e bestuur ta consisti di studiante di Aruba y un persona grandi di edad y cu ta bou guia di departamento Cultural di Cas di Aruba. Nan lo sigui organisa evento cultural pa hoben y grandinan, temanan educativo y lo partipa tambe den tereno social.

 

E evento aki a wordo subsidia dor di muncipio di Den Haag.

E meta cu nan tin pa promove nos cultura bou di e studiantenan na Hulanda, a bira un hecho. Studiante y persona mas grandi a participa n’e evento.

 

Wethouder di ‘Sociale Zaken, Werkgelegenheid, Wijkaanpak en Sport’, di municipio Den Haag, sr. Rabin Baldewsingh, a presencia e anochi cultural aki y a gosa con nos Arubianonan ta celebra habrimento di aña na Aruba. Señora Nuris Dabian a lesa un discurso den nomber di Ministro Plenipotenciario di Aruba, Guillfred Besaril, cu pa motibonan di compromiso no tabata por ta presente.

 

HARPA a entrega wethouder un plakaat como gradicimento pa tur su añanan como wethouder, specialmente como un persona cu a haci hopi pa migrantenan y nos ciudadano di Reino Hulandes.

 

E participantenan, entre otro tambe studiantenan, a duna un aporte n’e fiesta cultural aki. HARPA a ricibi hopi bon comentario pa diferente persona y fundacion na Hulanda. Hasta Presidente di Platform Alochtoon Ouderen (PAL) tabata presente.

PAL ta un plataforma renombra y uno grandi na Den Haag y cu ta traha bou di suspicio di municipio di Den Haag.

 

Tur presente a admira con e grupo di studiante a logra organisa nan prome actividad di e magnitud aki. E huradonan cu tabata encarga pa eligi e ganador pa e anochi aki tabata consisiti den personanan conoci den nos comunidad, manera Lidwina Booi, Jacky Wever, Alwin Toppenberg y Jair Versprey.

E participantenan a wordo compaña p’e banda tremendo di ClasiX, di Alvin Marchena.

 

Ganadornan di e Dande Festival t’e siguiente:

Di tres lugar, Gilia Croes, di dos lugar Xavier Geerman y e ganador di e anochi aki a keda na Miro Ridderstap, un amante di nos cultura na Hulanda.

 

Fundacion HARPA kier a gradici tur media na Aruba cu a duna nan aporte indirecto di divulga e Dande, unda nan colabora pa e informacion yega na nos Arubianonan na Hulanda.

Leave a Reply

Top