Resumen di Relato Mensual di october 2017 di BCA ta mustra Activo domestico netto a aumenta, mientras reserva di divisa neto a baha

Den e luna di october 2017, e cantidad di placa den circulacion a expande cu Afl. 16,9 miyon te na Afl. 4.174,4 miyon, compara cu september 2017. Esaki a wordo causa dor di un crecemento den e activo domestico netto (+Afl. 31,8 miyon) y un caida den e reserva di divisa netto (-Afl. 14,9 miyon), segun un resumen di e luna menciona, segun Banco Central.

 

E expansion den e activo domestico netto ta debi na un aumento den transaccion no relata na credito (+Afl. 39,5 miyon), cual a wordo parcialmente mitiga pa un bahada den credito domestico (-Afl. 7,7 miyon).

E subida den transaccionnan no relata na credito ta mas tanto relaciona cu un caida den e asina yama “shareholder’s equity”, aumento den e asina yama “accounts receivables and prepayments” y transaccionnan di clearing.

Credito domestico a disminui dor di menos credito bancario netto n’e sector publico (-Afl. 7,7 miyon), mientras cu credito bancario n’e sector priva a keda mescos.

 

Credito bancario netto n’e sector publico a baha principalmente dor di mas deposito di Gobierno (+Afl. 7,8 miyon). Credito bancario n’e sector priva a keda mescos dor cu e caida den credito na empresa  di Afl. 9,0 miyon a wordo completamente mitiga pa aumentonan den hipoteca pa vivienda (+Afl. 8,8 miyon) y credito na consumidor (+Afl. 0,1 miyon).

 

E bahada den e reserva di divisa netto di e sector bancario a resulta for di benta netto di divisa na publico (-Afl. 200,8 miyon), principalmente relaciona cu importacion di mercancia, e asina yama “income accounts”  y otro servicionan.

Esaki a wordo pa un gran parti mitiga pa compra netto di divisa for di publico (+Afl. 185,9 miyon), primordialmente relaciona cu entrada for di turismo, inversion directo y servicio di transportacion.

 

INFLACION

E nivel general di prijs, cu ta wordo midi dor di e indice di prijs di consumo, a registra un bahada di 0,4 porciento den e luna di october 2017, compara cu october 2016.

E contribuyente principal n’e caida aki t’e componente “Vivienda”, cu ta debi primordialmente na un reduccion den prijs di electricidad.

 

Otro componentenan cu tambe a registra bahada t’e componentenan “Recreacion y Cultura” y “Mobilario”. Di otro banda, e componentenan “Transporte”, “Cuminda y Bebida No-Alcoholico”, “Paña y Sapato”, “Educacion” y “Restaurant y Hotel” a registra un subida.

Si exclui e componentenan di cuminda y energia for di e indice di prijs di consumo, inflacion a mustra un aumento di 0,1 porciento compara cu october 2016.

Pa loke ta trata e promedio anual di e tasa di inflacion, esaki a keda mescos, esta un bahada di 0,4 porciento na october 2017, compara cu september 2017.

 

Leave a Reply

Top