Richard Arends: Partido AVP nunca a haci politica cu Finanza Publico

Durante e conferencia di prensa di AVP, e miembro di e fraccion berde Richard Arends, a pone hopi enfasis riba e hecho cu AVP nunca a hunga politica cu Finanza Publico di pais Aruba pa motibo cu nan ta considera esaki un material hopi serio.
E parlamentario ta bisa cu e tema aki ta un asunto hopi compleho y peligroso pa haci politica cune. E partido mas grandi awo den Gobernacion, a scoge pa esaki. Nan a bisa cu bahando e cantidad di Minister di 9 pa 7, eliminando gastonan di coordinador, como tambe eliminando loke nan ta yama luho, lo a reduci e deficit cu 50 miyon. Esaki ta e mesun suma cu mester a drenta den winstbelasting. E ta bisa con por ta cu den campaña ta papia di un plan y aworaki ta bisa cu no tin plan mas, cu nan no tabata na altura di e situacion di finanza publico.

E constelacion di CAFT, ta consisti di un miembro di Reino, un di Aruba y otro apunta di Gobierno di Hulanda. No solamente na Aruba tin transparencia den e Finanza Publico pero tambe na Hulanda nan ta na altura di loke ta pasa den Finanza Publico.

Loke si e ta haya preocupante ta cu e ta sinti di e declaracionnan di Minister di Finanza Ruiz Maduro, cu Aruba ta bayendo direccion di un KB, unda Gobierno di Reino ta bay indica kico ta bay sosode cu presupuesto di Aruba. E pais aki, el a bisa, a yega di pasa den algo similar na 2014, ora cu Conseho di Minister di Reino interveni den algo cu ta competencia di Aruba cual tabata e ley di presupuesto, unda cu Gobierno a mustra su obheccion den esaki y a haya rason den expresion haci door di Raad van State. Nan  a bisa cu Gobierno di Reino no tabatin autoridad pa interveni. Awor sinembargo, e ta bisa, ta papia di un otro tipo di intervencion, unda Conseho di Minister di Reino ta bay tuma autoridad di Minister di Finanza di Aruba. “Un situacion hopi lamentabel, unda cu esnan cu tabata den Gobernacion a entrega un presupuesto supletorio cu ta cumpli cu e normanan di CAFT. Ki a pasa den e ultimo tres simannan ta un misterio hopi grandi pa nos,” e Parlamentario a bisa.

Pa e seriedad di e tema di Finanza Publico nunca a haci politica cu esaki. Director di Finanza a entrega (na Gobernador)  un informe hopi cla di loke ta e maneho cu a wordo hiba e ultimo 4 añanan y diferente escenario con pa continua cu e maneho aki. Pesey e ta spera sinceridad di e Gobernantenan den nan expresionnan pasobra Finanza Publico semper ta un di e areanan mas transparente semper.

 

Leave a Reply

Top