Segun profesornan: Mitch Henriquez no a fayece door di stress agudo cu no ta un condicion cu ta existi

Den corantnan Hulandes den fin di siman a keda publica un articulo di un entrevista cu a wordo haci na e radio emisora NOS riba e caso di Mitch Henriquez, kende a fayece despues di su detencion na juni, 2015, durante un bishit ana Hulanda.
E caso penal contra e Polisnan a wordo trata luna pasa y dia 23 di december awor ta spera sentencia den e caso aki.
Mitch Henriquez no a fayece door di un sindroma agudo di stress. Esaki ta wordo bisa door di tres profesor specialista den cuido intensivo den e programa radial Argos cu a pasa ayera diadomingo. Ministerio Publico ta basa nan mes, segun e profesornan, riba un fenomeno cu no ta existi mes.
Profesor Armand Girbes di VU Medisch Centrum, Profesor Jan Bakker di New York University, profesor Diederik Gommers di Erasmus MC y Cardiologo di Cuido Intensivo Rémon Baak di Haagse Ziekenhuis, tin nan dudanan den e conclusionnan di e expertonan forensivo den e caso di Henriquez.
E tres profesornan ta bisa cu falta mas informacion, cu ta haci dificil pa yega na e causa exacto di morto. Stress Agudo nunca, segun nan, por ta e causa di morto. “Mi ta specialista den medicina di Cuido Intensivo, y mi no conoce e condicion aki,” segun Armand Girbes di VU Medisch Centrum. “Pa bis’e di un forma bunita, e no ta un malesa of sindroma defini. Den simpel Hulandes: e no ta existi. Y bo no por fayece di algo cu no ta existi.”
Rémon Baak ta confirma esaki. E tabata esun cu a atende Henriquez despues cu el a wordo treci na e hospital.
E expresionnan aki ta wordo haci net prome cu e sentencia den e caso contra e dos Polisnan cu a detene Henriquez dos aña pasa. Nan ta wordo persigui pa maltrato, pero no pa asesinato ni pa morto di culpa.
E Arubiano di 42 aña a wordo deteni na final di juni, 2015 durante un festivaol na Den Haag, e.o. pasobra el a grita cu e tabatin un arma cune. El a wordo pusha contra suela y wanta den un nekkle. El a fayece un dia despues. No tin mucho claridad riba e causa di su morot.

Inicialmente a wordo pensa cu Mitch Henriquez a fayece di e nekklem cu e Polisnan a uza riba dje. Pero for di e imagennan di video di e aresto, segun e expertonan, ta mustra cu e klem no a dura asina hopi, cu e Arubiano por a fayece di esaki. Stress y paro cardiaco ta e causa di su morto, segun pensamento di OM.

Top