Segun Prome Minister Wever Croes a sinti cu Rutte ta duna Aruba espacio pa busca solucion pa Finanza Publico

Den un audio manda pa prensa, Prome Minister Wever Croes ta papia di e su prome encuentro cu su colega di Hulanda, Mark Rutte. E prome reunion aki no tabata personalmente sino via teleconference y na final di su declaracion e ta bisa di a sinti cu e mandatario Hulandes lo duna Aruba espacio pa traha y busca un solucion pa e situacion financiero cu nan ta bisa di a haya Aruba aden, pa cual nan no por cumpli cu e normanan palabra di presupuesto di un deficit di 0.5%.

Scuchando e declaracion por conclui ta e mesun informacion cu a wordo duna na Gobernador Alfonso Boekhoudt ta loke cu a wordo pasa pa Prome Minister di Hulanda Mark Rutte. E impresion tabata cu esaki tabata un combersacion unda cu e Gobernante Hulandes a mustra di ta hopi solidario cu e Gobierno nobo di Aruba.

A papia di e situacion cu Gabinete Wever Croes a bin topa cun’e, nada den sede di Gobierno pa traha ni informacion di loke a wordo haci den e Gobernacion anterior. EL a priminti Rutte cu den futuro cualkier Gobierno cu tuma over di nan, “lo haya un traspaso responsabel p’asina nos garantisa cu e historia di Gabinete Wever Croes keda registra pa semper”.

E otro tema, banda di e convivencia cu Rutte a expresa pa e situacion cu Aruba ta pasando aden cu morto di e 2 muchanan, tabata e tema financiero. “Mi a informe cu den tur probabilidad, segun e consehonan cu nos ta haya di CAFT tambe, nos lo no por cumpli cu e exigencianan den ley di CAFT pa loke ta finanza publico di Aruba. Mi a splike caba con e Gobierno anterior a laga un deficit di riba 50 miyon atras, adicional, y riba dje a bini un deficit adicional di 70 miyon pasobra e refineria no por cumpli cu su pagonan na Gobierno di Aruba. Esaki ta haci cu pa e aña’ki nos tin desafio financiero hopi grandi y pa otro aña uno hopi mas grandi di casi 200 miyon florin. Pero mi a sigur’e tambe cu nos ta trahando riba un plan, un trayectorio con nos ta trece Aruba bek riba e rumbo corecto sin cu esaki ta pone un peso demasiado grandi riba nos comunidad. El a aprecia cu ya Aruba mes ta tumando e iniciativanan, nos mes ta bisa nos ta bay prepara un plan. Mi a splike tambe cu unabes  e plan ey ta cla, nos lo kier reuni cu nan pa yega na un palabracion concreto riba e caminda pa sigui padilanti.”

El a sigui bisa cu “nos a reitera cu nos kier tin un bon relacion den Reino. Y manera mi a bisa semper, nos vision semper tabata un bon relacion den Reino a base di madurez y a base di respet mutuo, cu ta nifica cu nos mes mester atende cu nos problema. Si nos no por, anto nos lo bati na porta di Hulanda. El a aprecia e asercamento aki semper y mi a confirma esaki cerca dje.”

Tambe e mandatario Arubiano a duna su conclusion di con el a sinti cu e prome reunion cu su colega Hulandes a bay. “Mi mester bisa cu mi prome reunion cu e Prome Minister di Hulanda a bay hopi bon. Mi a sinti cu espacio ta bay wordo duna na nos na Aruba pa atende cu e retonan cu nos a encontra den e Gobernacion nobo y cu ta duna nos espacio pa bini cu e trayectorio financiero nobo aki, sin cu nos mester pone un peso adicional riba comunidad. Mi ta considera esaki un punto hopi importante cu ta yena nos di mas speransa y confiansa cu nos por atende cu e tema financiero di Aruba di un forma responsabel.” Te aki e declaracion oficial duna door di Prome Minister Wever Croes.

Leave a Reply

Top