Studiante atraca den area di Rancho

Diadomingo, pa mas of menos 9’or y 46 di anochi Central ta manda patruya na Tierras Colombianas pa un atraco.

Eynan a bin topa cu un homber habla Ingles, kende a keda desconoci pa polis. E homber parce di ta un di e studiantenan di Xavier University. E homber tabata papa soda y su pupilnan tabata grandi. Polis a sospecha cu e homber aki tabata bao di influencia di un of otro substancia. E homber a informa polis cu e tin un luna na Aruba. E tabata perdi, ora cu dos homber a gar’e tene y a ranca un cadena for di su nek. Ambos homber a core bay.

E no por a duna descripcion na polis y tabata completamente histerico. E homber a keda bisa polis cu e no kier a keda eynan y a cana bay sin duna bon informacion y un denuncia. Un homber kende tabata testigo, a laga sa cu un di e atracadornan tabata e homber GC. E testigo no kier a duna su nomber. Polis a bay den vecindario di Ranchostraat, pero no a topa cu G. Central a wordo poni na altura.

Leave a Reply

Top