Tension den Cuerpo Policial A pidi retiro di Alto Comisario Dolfi Richardson, kende no tin atencion mas pa Cuerpo Policial

Otro siman lo tin un decision, pa tin claridad den Cuerpo Policial, segun Minister di Husticia, mr. Andin Bikker

 

Awe tardi 2’or, Sindicato di Polis SPA, a convoca un reunion general extra-ordinario pa su miembronan. Esaki mester a tuma luga den Club di Polis, POVA, pero mirando e asistencia pober, a dicidi di cera e reunion, pero pa convoca esaki pa 3 or. SPA hasta a prepara pa Minister di Husticia, mr. Andin Bikker ta presente, pa informa e miembronan di su decision. Pero e atendencia a laga di desea, pa cual dirigentenan di SPA a critica su miembronan formalmente.

 

Hasta a califica e propio miembronan aki como un set di cobarde, alegando cu nan kier material pa drecha Cuerpo Policial, pero ta keda sin presenta n’e reunion. Tin hopi critica den direccion di SPA, bisando cu SPA no ta convoca ningun reunion, pero ora cu a yama un reunion, e mesun miembronan no ta duna acto di presencia, loke por ser califica como un mocion di desconfianza den directiva actual di SPA.

 

E meta di e reunion ta basa pa pidi retiro inmediato di Dolfi Richardson, como Alto Comisario, kende no ta motiva mas pa dirigi Cuerpo Policial aki. Segun fuente ta indica, cu lo propone pa Trudy Hassell bira esun cu lo ocupa e puesto temporalmente te ora e proceso di eligi un Korpschef nobo.

E setting ta mustra masha normal mes, comosifuera ta algo entre polis cu polis. Pero segun nos fuente cu esey no t’e caso. E hecho cu mayoria di miembro a nenga di bay e reunion aki, pasobra nan ta sinti cu politica a cuminsa meta den Cuerpo Policial.

 

Despues di e reunion aki, a papia cu Minister di Husticia, mr. Andin Bikker kende a duna di conoce cu dia el a asumi responsabidad di cartera di Minister di Husticia, el a bin hay’e cu un Cuerpo Policial masha demotiva. SPA a informa e mandatario, cu nan falta di material, uniformnan ta bieu, no tin suficiente auto y un cantidad di problema mas.

Pues e actual Cuerpo Policial ta uno hopi demotiva y tambe SPA a señala cu como e Alto Comisario a señala for di basta tempo pasa, cu e no kier keda den dicho posicion y kier bay den un otro reto, ta haci cu e focus di e Alto Comisario ta otro caminda y como tal e no tin atencion p’e Cuerpo manera e tabatin e temponan aya.

 

Segun Minister Bikker, esaki a pone cu SPA kier claridad y a convoca e reunion di ayera tardi p’e miembronan, maske cu e mandatario a reuni varios biaha caba cu e sindicato. Pero ayera SPA a presenta un carta, caminda basicamente nan ta expresa atrobe e falta di atencion, no tin suficiente material y pesey el a presenta n’e reunion ayera tardi na POVA.

Esaki ta motibo cu SPA y su miembronan kier claridad di kico ta pasando.

 

Maske di otro banda, varios ocasion, Minister Bikker a sinta cu e Alto Comisario, pesey ayera tardi, el a bin participa na SPA y su miembronan cu otro siman lo tuma un decision pa cu Mando di Cuerpo Policial y asina trece claridad cu tur partido kier. Manera tin pensa, lo sea institui un Management Team pa dirigi Cuerpo Policial of lo nombra un Alto Comisario interino, te ora cu haci un solicitud habri pa haya un Alto Comisario nobo.

 

Segun Andin Bikker, no ta awor, pero for di algun tempo caba e actual Alto Comisario kier otro reto e.o. kier institui un instancia pa loke ta Interpol y combati terorismo, pero ex Minister di Husticia, mr. drs. Arthur Dowers no a regla e instancia aki at all. Siendo un par di siman prome cu eleccion, un decision a tuma, sin consulta cu e institutonan necesario, creando mas incertidumbre.

Pero siman binidero lo mester tin claridad pa cu maneho di Cuerpo Policial, y asina restaura e tranquilidad den Cuerpo Policial y den comunidad, pa focus riba siguridad na Aruba.

 

 

Leave a Reply

Top