Tin tur indicacion cu Gobierno aki kier Destitui Kathy Paskel pa nombra un Management Team na DIMAS

Por spera un otro caso contra di Gobierno, si sigui cu e intencion pa distitui Kathy Paskel for di e posicion di Directora di DIMAS.

Aparentemente e Directora di DIMAS no kier cumpli cu e peticion pa legalisa algun Venezolano cu ta na Aruba pa algun dia caba, cu ta motibo cu Gobierno kier termina su confianza den e profesional aki.

P’e no mustra obvio, Gobierno lo a ofrece Kathy Paskel e posicion p’e bira Ombusman, cu ta un puesto vacante pa hopi tempo caba, pero el a nenga esaki.
Gobierno tin intencion, bao di e pretexto di kier reorganisa DIMAS, instala un Management Team, cu mester finalisa tur loke tin pendiente pa despues via solicitud busca un Directora nobo pa DIMAS.

Instalando un Management Team, y asina destitui Kathy Paskel for di funcion di Directora di DIMAS, sin motibo valido, ta motibo p’e entama un caso hudicial contra di Gobierno.

Mas ainda, Kathy Paskel tin backing di Gobierno Hulandes, p’e bon trabo cu e ta haciendo. Nos lo tende mas di e decision di Gobierno actual, unda kier retira Directora di DIMAS, pasobra e no kier legalisa algun Venezolano, cu ta na Aruba for di algun tempo caba y nan ta masha liga na un Minister di Gabinete Wever-Croes.

Leave a Reply

Top