Un di e doñonan di Riu bou investigacion di corupcion; Esaki no ta afecta operacion di RIU na Aruba

Informacion internacional ta mustra cu e empresario Mayorqui, Luis Riu Güell, copropietario di e cadena hotelero Riu Hoteles, a wordo aresta na Miami pa supuesto compensacionnan ilegal na un funcionario.

E hotelero mes a presenta pa entrega su mes na  husticia di Miami-Dade despues cu el a  yega Merca.

El a paga un fiansa di 20 mil dollar pa e por keda den libertad.
Den combersacion cu un bosero di RIU aki na Aruba, Danny Nieto, el a confirma e noticia pero a bisa na mesun momento cu e sucedido aki no tin nada di haber cu e operacionnan na Aruba y lo no afecta esakinan tampoco

Segun por a compronde di e informacionnan internacional, e hotelero ta wordo investiga pa ofrece estadia gratis den hotelnan di luho na e anterior director di construccion di e ciudad di Miami Beach, Mariano Fernández.

Fiscal encarga cu e caso, Katherine Fernandez Rundle a splica den un sesion publico cu e director di construccion di e ciudad di Miami Beach, Mariano Fernández, “a ricibi vacacion di luho y trato VIP pa accelera e cobra- y permisonan di hotel RIU Plaza na South Beach, mientras cu e no a ricibi ainda e permisonan of a pasa e inspeccionnan structural”.

Fernández a entrega  su mes na autoridadnan ora cu el a wordo
descubri y ta enfrenta un cargo di compensacion ilegal y otro di asociacion delictivo pa comete compensacion ilegal.

Hunto cu Fernandez, fiscalia ta acusa e propietario di Riu y e vice presidente regional di e compania, Alejandro Sánchez Arco, como tambe e filial di e cadena hotelero na Florida.

Ta wordo sospecha cu Fernández a yuda e compania hotelero a cambia di haya cambernan gratis y descuentonan grandi den e hotelnan di Mexico y Republica Dominicano.
RIU Hotels & Resorts di Spaña a bisa cu Luis Riu a biaha boluntariamente y specificamente, manera palabra cu autoridadnan di Merca, pa Miami pa entrega su mes.

Despues di e audiencia a fiha un suma di “bail” y cu ta haci cu e por bay den libertad mientras cu  investigacion di e caso  a sigui. El a declara su mes inocente di e  cargonan caba.

E cargonan ta relaciona cu renobacion di hotel Riu Plaza, cu su proceso di remodelacion a extende for di 2013 te cu juni 2016 y cu mester a haya autorisacion di inspeccion di Departamento di Construccion di Miami. E caso aki ta bini na momento cu e compania hotelero ta trata di amplia su actividadnan den e zona cu cuatro instalacionnan cu mester keda inaugura e aña’ki, ademas di cinco renobacion grandi.

Leave a Reply

Top