Un sospechoso di asesinato declara liber

Reces a caba diabierna pa Corte y tabatin sentencia di un caso, cual tabata e asesinato cometi riba El Capitan den Rancho. E dos acusadonan den e caso aki ta Noel J. y Gerard E., pa kende ambos Ministerio Publico a pidi 18 aña incondicional.
E hecho aki a tuma luga dia 24 di april, 2016, unda cu esun cu a perde su bida tabata e Colombiano yama El Capitan. Dos homber arma a yega eynan, a exigi placa y droga y ora cu el a lucha un di nan a tire mata. E dos persona deteni den e caso aki ta e acusadonan ariba menciona.
Diabierna mainta Hues a cuminsa pa duna sentencia prome den e caso di Noel J. Den bo caso, Hues a bise, mi ta declarabo liber di e acusacion pasobra no a keda convincentemente proba bo envolvimento den e caso aki.
Hues a señala cu Polisnan a interoga e testigo ocular 5 siman despues di e sucedido. Ademas den e confrontacion fotografico, a mustra e testigo un solo potret pa señala e sospechoso envolvi den e atraco fatal. Ley ta bisa, cu mester tin dos fuente y no tin otro declaracion pa apoya e testimonio di Spanner. Ademas, ta papia di un sospechoso cabey blond, y e acusado aki no tin cabey blond. Debi cu tin duda no por condena e acusado.
Den e caso di Gerard, si Corte a haya proba legalmente y convincentemente di su rol den e delito aki. Spanner a duna un declaracion detaye di su rol den e delito. El a duna informacion cu e Polisnan cu no tabata presente no por tabata sa di dje. Spanner a papia di un golpi cu e homber a haya na su cabes cu e cabo di e arma y autopsia a mustra cu berdad tin e sla aki. E testigo a reconoce e acusado aki y a señale cu descripcion como un di esnan responsabel. Banda di dje, tin e declaracion di Noel, kende a combersa cu Gerard ora cu nan tabata cera hunto. Sin sa di ki caso Polisnan tabata papiando, ora cu e interogue el a bisa loke cu Gerard a cont’e, esta cu el a tira un hende mata durante un atraco na Rancho. Esaki mientras cu Polisnan no a bay pa interogue riba e caso ey. E declaracion aki cu el a duna hunto cu mas informacion ta mescos cu loke Spanner a bisa.
Tambe pa Corte a keda proba cu e tabatin arma di candela den su poder. Hues a mustra riba e diferente potret- y mensahenan cu a haya riba un celular cu e tabata uza. E ta bisa cu nan no tabata di dje, pero e tabatin nan den su man.
Basa riba tur e puntonan aki, Corte ta haye culpabel di e delito di asesinato y posesion di arma di candela pa cual el a wordo condena na 15 aña di prizon.
E otro acusado ta parce cu no a realisa cu el a wordo declara liber, pero e tabata mas preocupa pa e hecho cu nan ta bay wanta e responsabel pa a basha bou riba Gerard kende awor tin cu sinta un castigo di 15 aña.
Tur e partidonan tin 2 siman di tempo pa apela e decision aki di Corte.

Leave a Reply

Top