VanEps Kunneman VanDoorne ta gana premio Hulandes pa mihor campaña di mercado laboral hurídico

AMSTERDAM- E campaña di mercado laboral ‘Abogado den Caribe’ di VanEps Kunneman VanDoorne a wòrdo coroná cu e “Gouden Toga” (Toga di Oro) 2017.

E premio aki p’e mihor campaña di mercado laboral hurídico, ta wòrdo otorgá anualmente dor di e revista hurídico Hulandes Mr.

Diabièrnè 5 di janüari, e socio gerente Focco Lunsingh Scheurleer y e sosio Vincent Abbing a ricibí e “Gouden Toga” na Amsterdam.

 

E ganador di e “Gouden Toga” ta wòrdo scogi cada aña dor di un hurado di experto riba tereno di HR y comunicacion. E aña aki tabatin e.o. un abogado y un profesor di Organisacion y servicio hurídico den e hurado.

Otro nominadonan p’e premio e aña aki tabata e.o. oficinanan grandi y renombrá manera Allen & Overy, Bird & Bird y NautaDutilh.

 

Socio gerente Focco Lunsingh Scheurleer: “Cu nos campaña ganador ‘Abogado den Caribe’ nos kier mustra kico abogacia ta enserá den e region Caribense, y kico bo por spera como abogado cu experencia òf abogado principiante, serca un top oficina den e parti tropical di e Reino”.

Segun e rapòrt di hurado di Mr. nos a logra e meta aki ampliamente.

“Ta trata di un campaña original cu ta representá, hopi bon, e soño di futuro di e grupo di enfoke.”

 

Banda di esey e hurado ta elogiá e bon relacion di texto y imágen y e lenguahe y contenido cla cu ta percura cu ta completamente evidente ken VanEps Kunneman VanDoorne ta busca y kico e oficina tin di ofrecé n’e candidatonan.

Leave a Reply

Top